Joan edukira

Farmazia-bulegoetan errezetarekin banatzea eta BISAK 

Prestazio mota 

Farmazeutikoa

Zertan datza?

Osasun Sistema Nazionalak (OSN) finantzatzen dituen sendagaiak, osasun-produktuak, formula magistralak eta produktu dietetikoak farmazia-bulegoetan banatzea da, betiere Entitateko medikuek Mufaceko errezeten taloitegietan preskribatu badituzte, aldez aurretik eskatuta eta mutualista bakoitzaren afiliazio-zenbakiari esleituta.

Banaketarako bideari dagokionez, produktu horiek modu konbentzionalean banatu daitezke, hau da, paperean, edo elektronikoki. Ikus errezeta elektronikoaren atala, bertan jasota baitago zein erkidegotan ezarrita dagoen.

Hautaketa publikoko mutualisten kasuan, alergien aurkako banakako txertoak eta txerto bakterianoak preskribatzeko erabiliko da errezeta-taloitegia (ERREZETAREN BISA ere beharko dute), baita formula magistralak preskribatzeko ere, preskripzio horiek autonomia-erkidegoko errezeta elektronikoaren sisteman sartuta ez badaude.

  • ERREZETEN BISA ETA BESTE BALIDAZIO BATZUK 

Sendagai eta produktu jakin batzuk emateko, farmaziei buruzko araudiak kasuan kasuko errezeten bisa eskatzen du. Ekintza hori Zerbitzu Probintzialean egiten da errezeta elektronikorik ez dugunean, eta, horretarako, mediku espezialistaren txostena aurkeztu behar da, dagokion formularioan. Txosten horrek bertan adierazitako aldirako balio du, eta gutxienez urtean behin eguneratu behar da, bisaren baimena berritzeko.

Sendagai batzuek ez dute bisarik behar, MUFACEren Zerbitzu Probintzialaren baliozkotze berezi bat baizik, errezeta elektronikorik ez dagoen lurraldeetan. Informa zaitez Klonazepam printzipio aktiboa (ESTEKA) duten sendagaiei buruz eta tabakoa erretzeari uzteko sendagaiei buruz (Tabakoaren aurkako programarako esteka).

  

  • BISA LORTZEKO BIDEAK

Errezetak zigilatu behar dituzten mutualistei kudeaketak errazteko, errezetak lortzeko honako bide hauek daude, lehentasun-ordenaren arabera:

  1. Dokumentazioa postaz bidaltzen da Zuzendaritza Probintzialera (ikusi kontaktua gure bulegoetan) eta bide beretik jasotzen da. Nolanahi ere, idatzi bat bidali behar da oinarrizko datuak eta harremanetarako datuak adierazita. Lehen bisa bada, medikuaren txostena sartu behar da, baita errezeta ere. Lehen bisa ez bada, nahikoak dira errezeta eta harremanetarako oinarrizko datuak jasotzen dituen idazkia.

  1. Zerbitzu Probintzialean aurretiko hitzordua eskatzea eta aurrez aurreko kudeaketa. (Hemen, aurretiko hitzordua eskatzeko bideak daude kontsultagai, derrigorrezkoa baita bulego guztietan). 

Zerbitzu probintzialek bisa-izapideak errazteko neurri berrien berri emango diete mutualistei, haien jarraibideen arabera. 

 

Azkenik, gogoraraztekoa da identifikazio elektronikorik gabe ere egin daitezkeela kontsultak uneoro Mutualistaren Informazio Bulegoaren web-formularioaren (esteka honetan) bidez. MUFACEk gailu mugikorretarako duen APPtik ere sar zaitezke; erregistratzeko, sartu hemen.

Zenbatekoa

Kasuan kasuko produktua emateko, erabiltzaileak farmazia-bulegoak emandako produktuaren ordainketan parte hartu behar du, ekarpenen erregimen hau kontuan hartuta:

  • Ordaindu beharko den ekarpen arrunta: emandako produktuaren publikoarentzako salmenta-prezioaren % 30.

  • Ekarpen murriztuko produktuetan, partaidetza % 10ekoa izango da, eta gehienez 4,24 euro ontzi bakoitzeko.

  • Dietetika-produktuen eta gluzemia-tira erreaktiboen kasuan, ez da ekarpenik egin beharko. 

Nor izan daiteke prestazioaren onuradun? 

Edozein mutualista (nola titularrak hala onuradunak), atxikita dauden entitatea publikoa ala pribatua ote den alde batera utzita.

Paperezko taloitegia erabiltzeko baldintzak eta mutualisten erantzukizuna 

Errezeta-taloitegia agiri ofiziala, pertsonala eta besterenezina da, eta titularrak eta onuradunek baino ezin dute baliatu. Hautaketa publikoko mutualisten kasuan, paperezko taloitegia txertoak edo formula magistralak preskribatzeko baino ezin da erabili, edo autonomia-erkidegotik bertatik kanpo bidaiatu behar denean, betiere osasun-zerbitzu publikoen esparruan, eta inolaz ere ezin da preskripziorik egin, aipatutako osasun-zerbitzu publikoetakoak ez diren medikuek dokumentu ofizial hori baliatuta, ezta eremu horretatik kanpoko egintza medikoen kariaz ere. Osasun-laguntza nazionalerako entitate itundua aukeratu duten mutualisten kasuan, hautatutako entitatearen esparru medikokoak izan beharko dute medikuek, eta preskripzio-egintza, halaber, mutualitateak osasun-laguntzarako ematen duen prestazioaren esparruan gauzatu beharko da. Azkenik, Kanpoko Osasun Laguntzako Hitzarmenari atxikitako kolektibo mutualistak –nola titularrek hala onuradunek– ezin du paperezko errezeta-taloitegia erabili.

Mutualista zaren aldetik, zure errezeta-taloitegien gordailuzaina zara, eta zure ardura izango da hura zaintzea eta erabiltzea. Beraz, aipatutako kasuren batean edo antzeko beste batean behar ez bezala erabiliz gero, bidegabeko prestazioagatiko itzulketa-erreklamazioa edo, hala badagokio, erregelamenduak hausteagatik bidezkoak diren zehapenak ezarriko dira.

Aurkezteko epea

Orokorrean, errezetek 10 egun naturaleko balio-epea izango dute, preskribatzen diren egunetik edo, hala badagokio, bisatze-datatik zenbatzen hasita, banaka prestatutako estraktu hiposentsibilizatzaileen errezeten kasuan izan ezik, halakoek ezaugarri bereziak baitituzte eta, horrenbestez, epe hori 90 egunera luzatzen baita.

Dokumentazioa eta taloitegiak eskatzeko bideak. 

Taloitegiak honela eska daitezke:

 

24 X 365 LEHENTASUNEZKO BIDEAK

1) 060 telefono-zenbakira deituta (zerbitzu automatizatu berria). 

2) APParen bidez (identifikazio elektronikorik gabe, webgunean erregistratuta).

3) Beherago estekatuta dagoen prozesu elektronikoaren bidez, Cl@ve, ziurtagiri digital edo NAN elektronikoarekin.

  

LEHENTASUNEZKOAK EZ DIREN BIDEAK.

4) Eskaera postaz bidalita.

OHARRA: Posta elektronikoa Kanarietan, Ceutan eta Melillan bakarrik erabili ahalko da taloitegiak eskatzeko.

INPRIMAKIAK 

Araudia